Flýtilyklar
Umsögn Mannréttindaskrifstofu Íslands um tillögu til þingsályktunar
Umsögn Mannréttindaskrifstofu Íslands um tillögu til þingsályktunar um framkvæmdaáætlun í málefnum innflytjenda fyrir árin 2022-2025, þskj. 834, 592. mál.
Mannréttindaskrifstofu Íslands (MRSÍ) hefur borist framangreind þingsályktunartillaga til umsagnar. Fagnar skrifstofan tillögunni og telur einkar jákvætt að í framkvæmdaáætluninni er stefnt að því að tryggja jafnan rétt og samfélagsþátttöku allra samfélagsþegna óháð þjóðerni og uppruna.
Þrátt fyrir almenna ánægju með efni framkvæmdaáætlunarinnar vill MRSÍ koma eftirfarandi athugasemdum á framfæri:
MRSÍ fagnar fyrirhugaðri mótun stefnu í málefnum innflytjenda, flóttafólks og fjölmenningar. Telur MRSÍ slíka stefnumótun brýna og ætti hún að byggja á rannsóknum á aðstæðum innflytjenda, hvort sem er á vinnumarkaði, húsnæðismarkaði, í menntakerfi og hvar sem þörf er til að fá heildaryfirsýn yfir stöðu innflytjenda hér á landi. Þá ætti stefnumótun að sjálfsögðu að vera mannréttindamiðuð til að uppfylla þær alþjóðlegu skuldbindingar sem Ísland hefur undirgengist. Skýr stefna í innflytjendamálum verður og til þess að framangreindri framkvæmdaáætlun sem og öðrum aðgerðum í þágu innflytenda verði framfylgt á fullnægjandi hátt. Fagnar MRSÍ því markmiði að Ísland verði fjölmenningarsamfélag þar sem grundvallarstefin séu jafnrétti, réttlæti og virðing fyrir einstaklingnum.