Alþjóðlegt samstarf

Mannréttindaskrifstofa Íslands kemur fram fyrir Íslands hönd í ýmsu alþjóðlegu mannréttindastarfi.

AHRI

Meðal fastra samstarfsverkefna sem Mannréttindaskrifstofan er aðili að eru samtök evrópskra mannréttindaskrifstofa (AHRI) en skrifstofan átti þátt í stofnun þeirra á Íslandi árið 2000. Auk þess hefur skrifstofan tekið þátt í verkefnum um gerð kennsluefnis um mannrétttindi sem styrkt var af Evrópusambandinu, Friðarháskóla Sameinuðu þjóðanna og Ríkisstjórn Hollands. Á hverju ári fær skrifstofan fjölmörg tilboð um þátttöku í fjölþjóðlegum ráðstefnum og fundum um mannréttindi á vegum Sameinuðu þjóðanna, Evrópuráðsins og annarra stofnana og háskóla.

Human Rights in Developing Countries Yearbook

Skrifstofan var um nokkurra ára skeið aðili að samstarfsverkefni sjö evrópskra mannréttindastofnana um útgáfu árbókar um mannréttindamál í löndunum í suðri, Human Rights in Developing Countries Yearbook. Útgáfan hófst árið 1985 og var ætlað að nýtast breiðum lesendahópi: opinberum stofnunum, þróunarstofnunum, félagasamtökum, fjölmiðlum, fræðimönnum og almenningi. 

Nordic Journal of Human Rights

Mannréttindaskrifstofu Íslands var frá stofnun og all nokkur ár aðili að útgáfu tímaritsins Nordic Journal of Human Rights eða Mennesker og Rettigheter eins og það hét áður. Tímaritið er eitt fárra norrænna sérfræðirita um mannrétttindamál og var gefið út af mannréttindaskrifstofunum í Svíþjóð, Danmörku, Noregi, Finnlandi og Íslandi en nú sér Norska mannréttindaskrifstofan alfarið um útgáfu þess.  

Norrænu mannréttindaskrifstofurnar fimm hafa átt samstarf um ýmis önnur verkefni í gegnum tíðina svo sem ráðstefnur og útgáfu. 

16 daga átak gegn kynbundnu ofbeldi

Mannréttindaskrifstofan tekur árlega þátt í alþjóðlegu 16 daga átaki gegn kynbundnu ofbeldi.

Átakið hófst árið 1991 að frumkvæði Center for Women's Global Leadership í Rutgers-háskólanum í Bandaríkjunum. Átakið hefst þann 25. nóvember á ári hverju, nær yfir alþjóðlega alnæmisdaginn 1. desember og endar á mannréttindadaginn 10. desember. Síðan átakið hófst hafa 4.114 samtök í yfir 170 löndum tekið þátt í því til að draga athygli almennings og stjórnvalda að ofbeldi gegn konum og kallað eftir aðgerðum til að útrýma því. 

 

Alþjóðlegt átak UNITED gegn kynþáttafordómum

Mannréttindaskrifstofan tekur þátt í alþjóðlegu átaki gegn kynþáttafordómum á vegum samtakanna United for Intercultural Action.

Árið 1960 var 21. mars lýstur alþjóðlegur dagur til afnáms kynþáttamisrétti af allsherjarþingi Sameinuðu þjóðanna. Ástæðan var morð á 69 einstaklingum sem að mótmæltu aðskilnaðarstefnunni í Suður-Afríku. Á hverju ári taka þúsundir einstaklinga víðsvegar í heiminum þátt í hinni árlegu Evrópuviku gegn kynþáttamisrétti. Markmið átaksins er að vekja athygli á kynþáttafordómum sem finna má allstaðar í samfélagi okkar.

 

Mannréttindaskrifstofa Íslands

Mannréttindaskrifstofa Íslands var stofnuð í Almannagjá á Þingvöllum hinn 17. júní 1994, á fimmtíu ára afmæli íslenska lýðveldisins. Skrifstofan er óháð og vinnur að framgangi mannréttinda með því að stuðla að rannsóknum og fræðslu og efla umræðu um mannréttindi á Íslandi. 

Valmynd

Skráðu þig á póstlista MRSÍ

Skráðu þig og fáðu fréttir, upplýsingar um ný verkefni og fleira frá okkur.

Mannréttindaskrifstofa Íslands | Kt. 620794-2019

Túngata 14 | 101 Reykjavík | Sími 552 2720 | info[hjá]humanrights.is

Skrifstofan er opin frá 9-12 og 13-16