Takk-auglýsingaherferð Mannréttindaskrifstofu og AUGA

Takk herferðin

Þann 14. mars síðastliðinn hófst Evrópuvika gegn kynþáttamisrétti sem miðar að því að uppræta þröngsýni, fordóma og þjóðernishyggju í Evrópu.

Í tengslum við vikuna hefur skrifstofan hleypt af stokkunum auglýsingaherferð gegn fordómum gagnvart innflytjendum í samstarfi við AUGA - góðgerðarsjóð auglýsingaiðnaðarins. Markmiðið með auglýsingaherferðinni er að vekja fólk til umhugsunar um jákvæð áhrif fjölmenningar á íslenskt samfélag. Herferðin felst í því að þakka innflytjendum opinberlega fyrir að auðga mannlíf og menningu landsins og að taka þátt í að byggja hér upp fjölbreytt og öflugt samfélag.

Auglýsingaherferðin stendur í tvær vikur í sjónvarpi, blöðum og tímaritum, strætóskýlum og á netinu. Herferðin, sem er á vegum AUGA og Mannréttindaskrifstofu, er unnin í sjálfboðavinnu af auglýsingastofum innan Sambands íslenskra auglýsingastofa, SÍA. Árvakur, Fréttablaðið, Afa JCDecaux, Sjónvarpið, Stöð 2, Skjár einn, Mbl.is og Vísir.is munu birta herferðina og Capacent vinnur rannsóknarvinnu tengda átakinu.

Mannréttindaskrifstofan vinnur að ýmsum verkefnum er snerta á málefnum fólks af erlendum uppruna, s.s. er varða flóttamannamál, útlendingalöggjöf, ofbeldi gegn konum, mansal, atvinnuréttindi o.fl. en í þessu starfi hafa komið fram vísbendingar um að æskilegt væri að stuðla að jákvæðari umræðu um málefni fólks af erlendum uppruna. Undanfarið, í tengslum við efnahagsþrengingar og aukið atvinnuleysi, hefur einnig nokkuð borið á fordómum gagnvart innflytjendum í tengslum við vinnumarkaðinn.

Af þessum sökum ákvað Mannréttindaskrifstofan að sækja svo um til AUGA sjóðsins til að leggja í umfangsmeiri herferð sem hefði það að markmiði að uppræta fordóma og þröngsýni gagnvart fólki af erlendum uppruna á Íslandi og stuðla að samfélagi þar sem allir eiga jöfn tækifæri óháð útliti og uppruna.

AUGA er góðgerðarsjóður auglýsingaiðnaðarins sem er ætlað að gera samtökum sem sinna samfélagsstarfi kleift að ná betri árangri í starfi sínu með því að beita afli auglýsinga í þeirra þágu.

Sjóðurinn hefur gert herferðir til að auka öryggi unglinga á netinu fyrir SAFT/Heimili. Herferðin Látum hvítu ljósin lifa áfram! sem hvatti fólk til að lýsa upp skammdegið með hvítum ljósum var unnin fyrir trúfélögin í landinu.
nánari upplýsingar á http://www.sia.is/SIA/AUGA/

Fordómar og útlendingafælni á Íslandi

Kynþáttafordómar á Íslandi birtast helst í útlendingafælni og sleggjudómum gagnvart fólki af erlendum uppruna. Fordómarnir birtast einkum í hversdagslífinu - þegar talað er niður til þeirra sem ekki eru skilgreindir sem ,,hreinir” Íslendingar. Mannréttindaskrifstofan þekkir dæmi þess að fólki sé meinaður aðgangur að skemmtunum, að fólk af erlendum uppruna fær verri þjónustu og atvinnu, er látið afskiptalaust og er einangrað á vinnustað, er tortryggt og situr í verstu tilvikunum undir háðsglósum og svívirðingum.

Einna mest verður vart við fordóma gagnvart fólki af erlendu bergi brotnu í daglegu tali þegar öllum íbúum landsins er skipt niður í tvo hópa, þ.e. Íslendingar og nýbúar. Þá er gengið út frá því að sá munur sé afgerandi í öllum samskiptum fólks. Þessi aðgreining kemur oft fram í fjölmiðlum þegar notuð eru orð eins og "börn nýbúa" eða "konur frá Asíu". Sígilt dæmi um þetta er orðið "aðkomumaður" sem jafnvel er notað um Reykvíkinga sem heimsækja Hafnarfjörð. Þegar við skiptum öllum landsmönnum í einungis tvo hópa "nýbúa/innflytjendur" og "Íslendinga" gerum við ráð fyrir að andstæðurnar "við og hinir" skipti höfuðmáli. Um leið er gengið út frá því að allir "nýbúar" eða "innflytjendur" séu eins og hægt að aðgreina þá algjörlega frá öðrum íbúum landsins. Í umræðu um þjóðfélagsmál verða stundum til nýir fordómar um „hina“ og gömlum fordómum er viðhaldið. Neikvæð umræða um minnihlutahópa, t.d. í fjölmiðlum, leiðir til þess að fordómar aukast. Auðvelt getur verið að halda á lofti fordómum gagnvart minnihlutahópum vegna þess að fæstir þekkja þessa hópa af eigin raun. Við látum ef til vill of oft hjá líða að grípa til andsvara þegar fordómum er haldið á lofti. En hvað er íslenskt? Það gleymist gjarnan að Ísland er land innflytjenda þar sem ólíkir menningarstraumar hafa blandast í þúsund ár – við komum úr öllum áttum - hvenær hætti Ingólfur Arnarson að vera innflytjandi? Hvenær verð Auður djúpúðga Íslendingur? Þá má ekki gleyma þeim fjölda Íslendinga sem flutt hafa til annarra landa og heimsálfa. Tugir þúsunda Íslendinga eiga lögheimili bara á Norðurlöndum og við lítum með stolti til Vestur-Íslendinga sem sumir hverjir tala enn íslensku og hlúa að íslenskri menningu í Kanada.

Evrópuvika gegn kynþáttamisrétti 21. mars er alþjóðadagur gegn kynþáttamisrétti. Allsherjarþing Sameinuðu þjóðanna valdi þessa dagsetningu í minningu 69 mótmælenda myrtir voru 21. mars 1960 er þeir tóku þátt í mótmælum gegn aðskilnaðarstefnu stjórnvalda í Suður-Afríku. Í tengslum við 21. mars er haldin Evrópuvika gegn kynþáttamisrétti en þá koma þúsundir manna saman til að kveða niður kynþáttafordóma og misrétti í álfunni. Evrópuvika gegn kynþáttamisrétti hverfist um alþjóðadag gegn kynþáttamisrétti en markmiðið með henni er að byggja Evrópusamfélag víðsýni og samkenndar þar sem allir eru jafnir óháð útliti og uppruna.

Hvað eru kynþáttafordómar?

"Það er mjög niðurdrepandi að lifa á tímum þar sem auðveldara er að kljúfa atóm en fordóma"

                                                                                                             Albert Einstein

 

 

Kynþáttafordómar eru órökstuddir dómar um einstaklinga og hópa grundvallaðir á staðalmyndum byggðum á uppruna eða útlitseinkennum viðkomandi. Fordómafull manneskja hneigist til að sjá aðeins það sem samræmist hugmyndum hennar og treystir fordóma hennar og staðalmyndir. Flest höfum við fordóma en þegar fordómar og vald fara saman er voðinn vís. Stjórnmálaflokkar sem eru fjandsamlegir útlendingum og fólki af erlendum uppruna hafa alltaf notað innflutning fólks sem útskýringu á fjölda samfélagsmeina. Helförin, þjóðarmorðið í heimsstyrjöldinni síðari, er hræðileg áminning um hvað getur gerst ef umræðu um lýðræði og mannúð er ekki haldið lifandi. Til kynþáttafordóma teljast kenningar, heimsmynd, hreyfingar, samfélagsgerð og athafnir sem byggja á þeirri trú að mannkyni megi skipta í mismunandi kynþætti eða þjóðfélagshópa. Forvígismenn kynþáttahyggju telja ákveðna hópa fólks öðrum æðri vegna

þess að þeir tilheyri ákveðnum ,,kynþætti”. Kynþáttahatarar

flokka fólk í ,,kynþætti” eftir uppruna og útlitseinkennum s.s. húðlit, lögun augna eða háralit þó sýnt sé að líffræðilega erum við aðeins einn kynþáttur; mannkyn. Kynþáttafordómar eru flókið fyrirbrigði en með því að gera okkur grein fyrir þeim fordómum sem við höfum, vinnum við gegn þeim!

  

Hér má finna takk auglýsingarnar á: arabísku (arabic), rússnesku (russian) ,pólsku (polish), litháísku (lithuanian), spænsku (spanish), filippseysku (filipino) og kínversku (chinese).

 

Hér má finna dæmi um sjónvarpsauglýsingu á pólsku