Flýtilyklar
Margréti Steinarsdóttur var afhent svarta slaufan
Á fundi vinnuhóps þeirra ráðuneyta sem vinna að gerð UPR skýrslu til Sþ um stöðu mannréttindamála á Íslandi, sem haldinn var í Iðnó í morgun, var Rögnu Bjarnadóttur, fulltrúa innanríkisráðuneytisins og Margréti Steinarsdóttur, framkvæmdastjóra Mannréttindaskrifstofu Íslands, afhent svarta slaufan. Formaður Aðgerðarhóps Háttvirtra Öryrkja og Aldraðra, Helga Björk Magnúsdóttir og Grétudóttir afhenti slaufuna en hún er táknræn fyrir baráttu gegn sjálfsvígum meðal öryrkja og aldraðra.
Í bréfi meðfylgjandi svörtu slaufunni var bent á að skerðing á kjörum aldraðra og öryrkja sem enn hafi ekki verið leiðrétt og neikvæð viðhorf til þeirra hafi þau áhrif að valda þeim skömm og óþarfa sálarþjáningum. Óskað var eftir viðræðum við Mannréttindaskrifstofu Íslands um ástæður er liggi að baki sjálfsvígum öryrkja og aldraðra.
Mannréttindaskrifstofa Íslands þakkar fyrir svörtu slaufuna og er að sjálfsögðu tilbúin til viðræðna um þetta málefni og bendir á að rétturinn til að lifa mannsæmandi lífi, njóta efnahagslegra, félagslegra og menningarlegra réttinda eru sjálfsögð mannréttindi sem allir ættu að njóta og að auk þess að tryggja öllum samfélagsþegnum þessi sjálfsögðu réttindi hafa stjórnvöld skuldbundið sig til að standa sérstaklega vörð um réttindi hópa sem oft standa höllum fæti. Slíkt á oft og tíðum við um aldraða og öryrkja.