Flýtilyklar
Félags- og barnamálaráðherra endurnýjar samning um lögfræðiráðgjöf til innflytjenda
Ásmundur Einar Daðason félags- og barnamálaráðherra og Margrét Steinarsdóttir, framkvæmdastjóri Mannréttindaskrifstofu Íslands (MRSÍ), hafa skrifað undir endurnýjun samnings um lögfræðiráðgjöf til innflytjenda.
MRSÍ hefur um sjö ára skeið sinnt lögfræðiráðgjöf til innflytjenda þeim að kostnaðarlausu. Er hún veitt á grundvelli samnings við félagsmálaráðuneytið. Samkvæmt samningnum hefur skrifstofan fengið árlegan styrk til að standa straum af kostnaði vegna túlkaþjónustu og þeirra lögfræðinga sem sinna ráðgjöfinni.
Fengin reynsla sýnir að veruleg þörf er fyrir þessa þjónustu og fer aðsóknin vaxandi frá ári til árs. Mest er óskað eftir ráðgjöf á sviði fjölskylduréttar, einkum vegna skilnaðar- forsjár- og umgengnismála, en ýmis önnur mál koma einnig við sögu, s.s. ráðgjöf vegna dvalar- og atvinnuleyfa, húsnæðismála, fjárhagsörðugleika og ýmis önnur mál sem varða félagsleg réttindi innflytjenda. Óski einstaklingur eftir að hafa túlk með sér í viðtalið er það honum að kostnaðarlausu.
Síðastliðið ár hefur innflytjendum einnig verið boðið upp á viðtöl í Bjarkarhlíð sem er miðstöð fyrir þolendur ofbeldis í Reykjavík. Fyrirhugað er að bjóða upp á sömu þjónustu í Bjarmahlíð sem er samskonar miðstöð fyrir þolendur ofbeldis á Norðurlandi. Þá er fyrirhugað að MRSÍ muni veita reglulega lögfræðiráðgjöf til innflytjenda í nýrri ráðgjafastofu fyrir innflytjendur.
Lögfræðiráðgjöf Mannréttindaskrifstofu Íslands við innflytjendur er veitt í húsnæði skrifstofunnar, Túngötu 14, á miðvikudögum frá kl. 14-20 og á föstudögum frá kl. 9-14. Tekið er við tímapöntunum í síma 552-2720 eða í tölvupósti: info@humanrights.is