Flýtilyklar
Alþjóðadagur menningarlegrar fjölbreytni
Fréttatilkynning frá Borgarbókasafninu
Samstarf Borgarbókasafns við Reykjavík Bókmenntaborg UNESCO, frístundamiðstöðina Kamp, Landakotsskóla, Skóla – og frístundasvið og málfarsráðunaut Ríkisútvarpsins.
Árið 2002 staðfesti UNESCO að þann 21. maí ár hvert skyldi vakin athygli á þýðingu menningarlegrar fjölbreytni sem er sameiginleg arfleifð mannkyns og að hlúa bera að henni og varðveita í þágu allra manna. Í tilefni dagsins mun Borgarbókasafnið beina sjónum að menningarlegri fjölbreytni í sinni víðustu mynd og standa fyrir fjölbreyttri og skapandi dagskrá þar sem verður varpað ljósi á mismunandi raddir og tungumál borgarbúa á öllum aldri. Hér er ekki endilega átt við þjóðtungur eingöngu heldur leitum við eftir fjölbreyttum orðaforða og tungutaki og fjölbreyttum tjáningarleiðum og boðskiptum.
Safnið leggur almennt metnað sinn í að koma til móts við fjölbreytileika mannlífsins og fagnar honum alla daga með ríkri áherslu á þann fjársjóð sem býr í mismunandi tungumálum og menningarheimum borgarbúa. Meðal verkefna sem byggja sérstaklega á fjölbreyttri menningu má nefna Menningarmót - fljúgandi teppi, Söguhring kvenna og Café Lingua – lifandi tungumál, allt verkefni sem hafa fest sig í sessi í fjölbreyttu mannlífi borgarinnar.
Dagskrá Borgarbókasafns á Alþjóðdegi menningarlegrar fjölbreytni fimmtudaginn 21.maí: Sjá hér; einnig texta hér fyrir neðan, og á heimasíðu Borgarbókasafns.
Athugið að dagskráliðir yfir daginn höfða til mismunandi aldurshópa. Allir eru velkomnir!
Alþjóðadagur menningarlegrar fjölbreytni fimmtudaginn 21.5 – „Margradda maí“
Borgarbókasafnið | Menningarhús Grófinni, Tryggvagötu 15
11.00-11.45
„Hæ góðan dag“. Fjöltyngdur söngur og dans fyrir þau yngstu.
Rauðhetta á frönsku. Börn á leikskólanum Laufásborg sýna hvernig þau leika og læra á frönsku. Sólveig Simha býður upp á stutta kennslustund í frönsku fyrir öll áhugasöm börn.
12.45-14.00
Tónlistaratriði. 6. bekkur Landakotsskóla spilar tvö lög á stafspil undir stjórn Nönnu Hlífar Ingvadóttur.
Menningarmót og dans. 4. og 6. bekkingar Landakotsskóla bjóða gestum og gangandi að fá innsýn í fjölbreytta menningarheima þeirra. Markmið Menningarmótsins er að sýna að fjölbreytt menning, áhugasvið og ólík tungumál mynda mikilvægt menningarlegt litróf í samfélaginu öllu.
15.00-15.30
„Taktur og táknmál“, töfrandi taktveisla þar sem má upplifa ljóð eftir börnin, útfærð með takti og á táknmáli. Veislan er í boði frístundamiðstöðvarinnar Kamps.
16.00-17.30
Café Lingua |Sniðug málsnið og „lingó“
„Hnífaparið“ Halldóra Líney Finnsdóttir og Hekla Baldursdóttir, vinningshafar á Ljóðaslammi 2015, stíga á stokk með atriðið „Gervisykrað samfélag“
Hugvekjur:
-Áslaug Ýr Hjartardóttir, menntaskólanemi, fjallar um ólíkar raddir og mismunandi tjáningarform.
-Brandur Karlsson sýnir gestum hvernig hann stýrir tölvu til tjáningar með augunum.
Tungumálastöðvar:
Öllu áhugafólki um tungumál og orðaforða, úr öllum starfsstéttum, er boðið að koma og kynna sitt málsnið og sitt „lingó“ á tungumálastöðvum í safninu eða bara að líta við og drekka í sig lifandi og fjölbreyttan tungumálaheim borgarinnar.
Allir eru velkomnir að skrá sig á tungumálastöð (kristin.r.vilhjalmsdottir@reykjavik.is) eða bara að líta við og drekka í sig lifandi og fjölbreyttan tungumálaheim borgarinnar.
-Á Alþjóðadegi menningarlegrar fjölbreytni verður tilkynnt hvaða skólar séu orðnir formlegir Menningarmótsskólar skólaárið 2014/15
Sjá nánar: http://tungumalatorg.is/menningarmot/2015/04/30/viljid-thid-koma-i-hop-menningarmotsskola/