Hinn 21. mars hefur verið útnefndur sem alþjóðadagur gegn kynþáttamisrétti. Allsherjarþing Sameinuðu þjóðanna valdi þessa dagsetningu til að minnast 69 mótmælenda sem myrtir voru 21. mars árið 1960 er þeir tóku þátt í mótmælum gegn aðskilnaðarstefnu stjórnvalda í Suður-Afríku.
Samtökin sem halda utan um Evrópuvikuna heita United Against Racism og á heimasíðu þeirra er hægt að finna allar frekari upplýsingar um 21. mars sem og Evrópuvikuna. Þar er einnig að finna upplýsingar um hvernig dagskráin fer fram í öðrum löndum Evrópu á hverju ári. Dagana í kringum 21. mars hafa þúsundir manna komið saman eða staðið að ýmsum viðburðum til að kveða niður kynþáttafordóma og misrétti í álfunni. Evrópuvika gegn kynþáttamisrétti hverfist um alþjóðadag gegn kynþáttamisrétti og miðar að því að uppræta þröngsýni, fordóma og þjóðernishyggju í Evrópu. Markmiðið er að byggja Evrópusamfélag víðsýni og samkenndar þar sem allir eru jafnir, óháð útliti og uppruna.
Mannréttindaskrifstofan hefur haldið utan um vikuna hér á landi. Við höfum lagt upp úr því að vinna með ungu fólki og unnið verkefnið í samstarfi við ýmis æskulýðssamtök og hefur markmiðið verið að fræða ungt fólk um fjölbreytileika samfélagsins ásamt því að vekja þau til umhugsunar um þá fordóma sem er að finna þar. Síðan hafa ungmennin tekið þátt í viðburði þar sem þau dreifa boðskapnum áfram.
Við hvetjum alla áhugasama um Evrópuvikuna að hafa samband við okkur eða kynna sér hana nánar á vef UNITED http://www.unitedagainstracism.org/, hér á vefsíðunni eða á facebook síðu átaksins hér á landi https://www.facebook.com/evropuvika?ref_type=bookmark.