Vel heppnaður alþjóðadagur flóttamanna á Ingólfstorgi

22.6.2010

Sunnudaginn 20. júní s.l., á alþjóðadegi flóttamanna, héldu Mannréttindaskrifstofa Íslands, Rauði kross Íslands og Flóttamannastofnun Sameinuðu þjóðanna hátíð á Ingólfstorgi í Reykjavík með það fyrir augum að vekja athygli á stöðu flóttafólks í heiminum almennt, og á Íslandi.

Hátíðin var skipulög í samstarfi við hælisleitendur og flóttafólk, og var boðið upp á veitingar, tónlist, dans og kaffi. Veitingarnar, sem voru frá ýmsum löndum, voru afar ljúffengar, og var örtröð í tjaldinu þar sem listakokkarnir skömmtuðu mat frá m.a. Afganistan, Kólumbíu og Indlandi.

Á alþjóðadegi flóttamanna eru skipulagðir viðburðir um allan heim, með mismunandi yfirskrift ár frá ári. Heimili var yfirskrift alþjóðadags flóttamanna 2010. Áherslan var á raunir þeirra ríflega 40 milljóna karla, kvenna og barna sem neyðst hafa til að yfirgefa heimili sín vegna átaka, ofbeldis eða annarra aðstæðna.

Hér á Íslandi var leitast við að vekja almenning til umhugsunar um vanda flóttafólks en einnig mannauð. Fólki hættir til að líta á flóttafólk einungis sem fórnarlömb sem þarfnast hjálpar en það vill gleymast að það tekur einnig virkan þátt í byggja hér betra samfélag og hefur auðgað íslenska menningu og mannlíf.

Við viljum þakka þeim sem hjálpuðu til við að gera þennan viðburð eftirminnilegan – bæði sjálfboðaliðum sem og gestum og gangandi.

Fleiri myndir af alþjóðadegi flóttamanna 2010 má finna á myndasíðu Mannréttindaskrifstofunnar.

Senda grein